Sauðfjárræktin 2011

Sauðfjárræktin 2011

Anna Margrét Jónsdóttir


Hér birtast skýrslu­haldstölur ársins 2011 í sauðfjárræktinni. Í heild var aukning í afurðum um 0,1 kg eftir hverja skýrslufærða á á svæðinu sem er sama aukning og í fyrra. Þetta var þó aðeins breytilegt eftir sýslum og er mest aukning í V-Hún. Í heild sinni er svæðið 0,9 kg yfir landsmeðaltali sem er 26,6 kg.

Afurðir síðustu ára eru settar fram myndrænt hér fyrir neðan þar sem súlurnar sýna fædd lömb eftir hverja vetrarfóðraða á og línurnar sýna afurðir í kg eftir hverja vetrarfóðraða á. Þar sést glöggt hvað frjósemin eykst í öllum sýslum milli ára og og einnig sá mikli munur sem er á milli Stranda og V-Hún annars vegar og A-Hún hins vegar. Strandasýsla er nú í efsta sæti yfir landið og V-Hún í öðru meðan A-Hún er næst neðst. Þarna munar mest um frjósemina sem Austur-Húnvetningar þurfa að vinna áfram ötullega að því að bæta á næstu árum.

Í næstu töflum má sjá þá bæi sem efst standa í hverri sýslu fyrir sig, annars vegar með mestar afurðir eftir hverja á og hins vegar með hæsta gerðarmat sláturlamba. Þar má sjá glæsilegan árangur einstakra bænda á svæðinu. Gaman er að geta þess að meðal 10 afurðahæstu bænda á landinu eigum við á svæði BHS sex fulltrúa. Sömuleiðis eigum við tvo fulltrúa af 10 efstu bæjum í gerðarmati sláturlamba.

Afurðahæstu búin 2011 – yfir 100 skýrslufærðar ær
Eigendur Bær Fjöldi áa kg e. hv. á Fædd lömb
Indriði og Lóa Skjaldfönn 225 38,0 1,93
Guðbrandur og Lilja Bassastöðum 214 35,9 1,98
Guðbrandur og Björn Smáhömrum 290 35,8 1,99
Ragnar og Sigríður Heydalsá 480 34,9 2,00
Jón og Finna Klúku 164 34,9 1,98
Þormóður og Borghildur Sauðadalsá 496 38,2 2,07
Ellert og Heiða Sauðá 394 36,9 2,06
Baldur og Olga Saurbæ 473 35,8 2,06
Elín Anna og Ari Guðm. Bergsstöðum 411 34,9 1,93
Magnús og María Helguhvammi 2 188 33,9 1,90
Magnús og Líney Steinnesi 567 31,8 2,05
Jón og Eline Hofi 532 29,7 1,83
Pétur og Þorbjörg Hólabæ 288 29,3 1,75
Sigursteinn Bjarnason Stafni 237 28,8 1,87
Rafn og Ingibjörg Örlygsstöðum 228 28,3 1,92

 

Hæsta gerðarmat 2011 – yfir 100 dilkar
Eigendur Bær Fj. sl.-lamba Fall-þungi Gerð Fita
Björn og Badda Melum 1 469 17,17 11,09 6,74
Jón og Erna Broddanesi 1 455 18,12 10,73 7,69
Kristján Albertsson Melum 2 131 17,67 10,59 6,98
Guðbrandur og Björn Smáhömrum 380 17,76 10,28 7,25
Guðjón og Nicole Heydalsá 436 18,19 10,18 7,21
Sigvaldi og Þóra Urriðaá 583 18,45 10,74 7,73
Elín Anna og Ari Guðm. Bergsstöðum 770 18,21 10,59 7,66
Benedikt og Bjarney Neðri-Torfustöðum 350 18,22 10,39 6,95
Ellert og Heiða Sauðá 746 18,57 10,01 7,61
Benedikt og Sigrún Bergsstöðum 613 17,03 9,94 6,25
Jóhanna og Gunnar Akri 250 16,40 10,99 7,06
Pétur og Þorbjörg Hólabæ 433 17,78 9,80 7,79
Björn og Dagný Ytra-Hóli 169 16,23 9,78 6,14
Jón og Kristjana Stóra-Búrfelli 200 16,40 9,76 7,34
Jóhann og Erla Kambakoti 145 18,24 9,74 7,14

Að lokum birtum við töflur sem sýna stöðuna í lambaskoðun og sæðingum í ár. Nánast sami lambafjöldi var skoðaður í haust og árið á undan, talsverð aukning var á Ströndum en smávegis samdráttur í A-Hún.

Tvö lömb mældust með 38 mm þykkan bakvöðva og var það annars vegar lambhrútur í Stekkjardal undan Hriflon og hins vegar gimbur undan heimahrútnum Álfi 08-171 á Steiná 3.

Meðal ómvöðvi gimbra á svæðinu var 26,6 mm sem er aukning um 0,3 mm í fyrra en meðal ómvöðvi hrúta var 28,1 mm sem er einnig aukning um 0,3 mm. Þykkasti bakvöðvinn í >50 lamba gimbrahjörð var hjá Benedikt og Sigrúnu á Bergsstöðum á Vatnsnesi og var hann 29,9 mm. Næst á eftir þeim koma gimbrar þeirra Elínar Önnu og Ara Guðmundar á Bergsstöðum í Miðfirði með 29,8 mm og þar á eftir gimbrarnar hjá Birni Þormóði og Dagnýju á Ytra-Hóli með 29,5 mm.

Óveruleg aukning var í sæðingum milli ára eins og sést hér á meðfylgjandi mynd.